پۆلیسی کەرکوک: رێگای هەولێر ـ کەرکوک کرایەوە
وتەبێژی پۆلیسی کەرکوک ڕایگەیاند، لەسەر بڕیاری حەیدەر عەبادی سەرۆک وەزیرانی عێراق، رێگای هەولێر ـ کەرکوک کرایەوە.
ئەفراسیاو کامیل وتەبێژی پۆلیسی کەرکوک وتی، بڕیار لەسەر کردنەوەی رێگاکە دراوە و لە ئێستادا سەرقاڵی پاککردنەوەی رێگاکەن و لە سبەینێوە هاتوچۆی لەسەر رێگای کەرکوک ـ هەولێر ئاسایی دەبێتەوە.
هەر ئەمڕۆ فەرماندەی پۆلیسی فیدراڵی و بەرپرسە ئەمنییەکانی کەرکوک سەردانی پردێیان کرد بۆ بڕیاردان لەسەر کردنەوەی ڕێگاکە.
لە ڕووداوەکانی ١٦ی ئۆکتۆبەری ٢٠١٧دا، پردی سەرەکی ناحیەی پردێ لە سەر ڕێگای هەولێر ـ کەرکوک، تەقێنرایەوە و بەو هۆیەوە ماوەی زیاتر لە ٨ مانگە رێگاکە داخراوە، هاووڵاتیان بۆ ڕۆیشتن لە کەرکوکەوە بۆ هەولێر و بە پێچەوانەوە ڕێگایەکی دوور و سەخت دەبڕن.
Source - NRT
