ڤیدیۆ.. لە ڕووداوێکی هاتوچۆدا لەسەر ڕێگای هەولێر – کۆیە کوڕ و باوکێک گیانیان لەدەستدا

ڕووداوێکی هاتوچۆ لەسەر ڕێگای نێوان هەولێر – کۆیە ڕوویدا و بەهۆیەوە کوڕ و باوکێک گیانیان لەدەستدا و کەسێکی دیکەش برینداربوو.

زاهیر محەمەد بەڕێوەبەری هاتوچۆی کۆیە ڕاگەیاند، ڕووداوەکە دوانیوەڕۆی ئەمڕۆ لەسەر ڕێگای نێوان هەولێر – کۆیە لەنزیک گوندی کانی ماران، لەنێوان ئۆتۆمبێلێکی پاس و پیکابدا ڕوویداوە.

ڕاشیگەیاند، بەهۆی ڕووداوەکەوە پیکابەکە سوتاوە و لە ئەنجامدا کوڕ و باوکێک گیانیان لەدەستداوە، هەروەها کەسێکی دیکەش برینداربووە و ڕەوانەی نەخۆشخانەی فریاکەوتنی هەولێر کراوە.

لە ماوەی ڕابردوودا لەسەر ڕێگای هەولێر – کۆیە کە بە ڕێگای مەرگ ناسراوە چەندین ڕووداوی هاتوچۆ ڕوویانداوە و هاوڵاتیانیش هۆکارەکەی بۆ خراپی ڕێگاکە دەگێڕنەوە.

Source - NRT