كۆبونه‌وه‌ی لیژنه‌ی ئه‌منی ناحیه‌ی ته‌ق ته‌ق

لیژنه‌ی ئه‌منی ناحیه‌ی ته‌ق ته‌ق، له‌سه‌ر بارودۆخی ئاسایش و ئارامی ناوچه‌كه‌ چه‌ند بڕیارێكی ده‌ركرد له‌ ناحیه‌كه‌دا بەمەبەستی بنەبڕكردنی تاوان ‌و دیاردەی چەكداری‌ و ئۆتۆمبێلی بێ‌ ژمارە و بێ‌ مۆڵەت‌،

 سه‌ركه‌وت عوسمان، به‌ڕێوه‌به‌ری پۆلیسی ناحیه‌ی ته‌ق ته‌ق له‌بڵاوكراوه‌یه‌كدا ڕایگه‌یاند" له‌سه‌ر ڕاسپارده‌ی به‌ڕێز بریكاری وه‌زاره‌تی ناوخۆو له‌پێناو پاراستنی ئاسایشی گشتی و سه‌روماڵی هاوڵاتیان به‌سه‌رپه‌رشتی به‌ڕێز به‌ڕێوه‌به‌ری ناحیه‌ی ته‌ق ته‌ق (حاكم عمر ئه‌حمه‌د) و لایه‌نه‌ په‌یوه‌ندی داره‌كان له‌هێزه‌ئه‌منییه‌كان كۆبونه‌وه‌یه‌ك له‌سنوره‌كه‌ ئه‌نجام درا و بڕیار له‌سه‌ر بن بڕ كردنی ئه‌م دیاردانه‌ درا:

1- ده‌ست به‌سه‌ر داگرتنی چه‌كی بێ مۆڵه‌ت

2- قه‌ده‌غه‌كردنی هه‌ڵگرتنی چه‌ك له‌دوای ده‌وامی فه‌رمی، جگه‌ له‌وانه‌ی له‌لایه‌ن لێژنه‌ی باڵاوه‌ ڕێگایان پێ ده‌درێت

3- نه‌هێشتنی دیارده‌ی هه‌ڵگرتنی چه‌قۆ و حه‌ربه‌ و ته‌واوی ئامێره‌كانی شه‌ڕ كردن 

4- به‌دواداچوون و پشكنینی ورد بۆ مادده‌ هۆشبه‌ره‌كان

5- ده‌ست به‌سه‌رداگرتنی سه‌یاره‌ی بێ ژماره‌و جام تاریك و ژماره‌ نایاسایی

6-ده‌ست به‌سه‌رداگرتنی ماتۆرسكیلی بێ ژماره‌ و بێزاركه‌ر

7- بازگه‌كانی ئاسایش له‌ده‌ره‌وه‌ی شار بۆ هه‌مان مه‌به‌ستی سه‌ره‌وه‌ ڕاده‌سپێردرێن

8- هێزێكی هاوبه‌ش دروست ده‌كرێت له‌هێزه‌ ئه‌منییه‌كان هه‌ریه‌ك له‌ پۆلیس و ئاسایش و پۆلیسی هاتووچۆ و هێزه‌كانی به‌رگری و فریاكه‌وتن به‌ ئۆتۆمبێل و مصلحه‌وه‌ و غورفه‌یه‌كی عملیات داده‌نرێت

هه‌روه‌ها به‌ڕێوه‌به‌ری پۆلیسی ته‌ق ته‌ق، داوای له‌ خه‌ڵكی ته‌ق ته‌ق و ده‌وروبه‌ری كرد هاوكاریان بن و هه‌ر كه‌سێك یه‌كێك له‌م خاڵانه‌ ده‌یگرێته‌وه‌ خۆی هه‌ڵسێت به‌ نه‌هیشتنی و ده‌ستخۆشی لێ ده‌كه‌ین، هه‌روه‌ها وتیشی هه‌مووتان برا و كه‌س و كاری ئێمه‌ن و حه‌ز ناكه‌ین كه‌س نیگه‌ران  و زه‌ره‌رمه‌ند بكه‌ین