ئێران بەشێك لە ئاوی بەنداوەكانی بەردایەوە

"ئاوی دەربەندیخان 65 سانتیمەتر ‌و دووكانیش 23 سانتیمەتر زیادیكردووە"

بەهۆی بەردانەوەی ئاوی بەشێك لە بەنداوەكانی ئێران ‌و بارانبارینی چەند رۆژی رابردوو، ئاستی ئاوی هەردوو بەنداوی دوكان ‌و دەربەندیخان لە 24 كاژێری رابردوو وەك بەڕێوەبەری گشتی بەنداوەكانی هەرێمی كوردستان رایگەیاند "بەشێوەیەكی بەرچاو زیادیكردووە".  

ئەكرەم ئەحمەد، بەڕێوەبەری گشتی بەنداوەكانی هەرێمی كوردستان بە تۆڕی میدیایی رووداوی راگەیاند، ئێستا ئاستی ئاوی بەنداوەكانی دوكان ‌و دەربەندیخان بەشێوەیەكی بەرچاو زیادیكردووە ‌و گوتی "جگە لەو بارانەی لە چەند رۆژی رابردوو باریووە، ئەمڕۆ سێشەممە ئێران بەشێك لە ئاوی بەنداوەكانی بەردایەوە ‌و بەو جۆرەش لە 24 كاژێردا ئاوی دەربەندیخان 65 سانتیمەتر ‌و دووكانیش 23 سانتیمەتر زیادیكردووە، ئەو زیادكردنەش لەو ماوەكەمەدا زۆر زۆرە".

بەڕێوەبەری گشتی بەنداوەكانی هەرێمی كوردستان ئەوەشی خستەڕوو پێشبینی دەكرێت "لە ناوەڕاستی مانگی چواردا بەنداوی دوكان سەرڕێژ بكات و بەتەواوەتی پڕبێت".

لە هەرێمی كوردستاندا 17 بەنداوی گەورە‌ و بچووك هەیە، هەریەك لە بەنداوەكانی دوكان ‌و دەربەندیخان بە بەنداوە گەورەكانی هەرێمی كوردستان هەژمار دەكرێن، بەنداوی دوكان نزیكەی حەوت ملیار مەتر سێجا ئاو دەگرێت ‌و بەنداوی دەربەندیخانیش سێ ملیار مەتر سێجا ئاو دەگرێت.

بەنداوی دوكان لەساڵی 1959 لەلایەن كۆمپانیایەكی بەریتانی وەك یەكەم بەنداو لەسەر ئاستی عێراق دروستكراوە. 

بەنداوی دەربەندیخان لە ساڵی 1961 لەلایەن كۆمپانیایەكی ئەمریكی دروستكراوە.

Source - Rudaw